Fiziki nəticələr. Qətl
Bir çox tədqiqatlar zamanı aşkar olur ki, qurbanların qətli hal-hazırkı tərəf-müqabilləri və ya keçmiş partnyorları tərəfindən törədilir.
Cehiz vermək adəti olan ölkələrdə hədiyyə və ya pul şəklində cehiz verə bilməyən valideynlərin qızları üçün bu ənənə faciəli ola bilər. Hədələrlə başlayan zorakılıq məcburi ''intihar'', cismani xəsarətdən ölüm və ya qətllə nəticələnə bilər.

Ciddi xəsarətlər
Fiziki və cinsi sui-istifadə nəticəsində qız uşaqları və qadınlar çox ciddi xəsarətlər ala bilərlər. Uşaqlar və gənc qadınlara qarşı edilmiş təcavüz, qançır, sınıq və əlillik kimi xəsarətlə nəticələnir. Əksər xəsarətləri ciddi şəkildə müalicə etmək tələb olunur.

Arzuedilməz və erkən hamiləlik
Uşaq və ya yeniyetmə yaşlarında sui-istifadəyə məruz qalanların özlərinə hörmət hissi, sui-istifadəyə məruz qalmayanlara nisbətən daha az olur. Onlar daha çox özlərinə qarşı etinasız olur, erkən və qorunmadan cinsi əlaqə kimi riskli məsələ ilə məşğul olurlar. Çoxsaylı tədqiqatlar göstərir ki, uşaqlıqda cinsi sui-istifadəyə məruz qalan qızlar yeniyetmə dövründə daha çox arzuedilməz hamiləliyə düçar olmaq təhlükəsi altında olurlar.
Arzuedilməz hamiləliyin bu böyük təhlükəsi özü ilə bərabər əlavə problemlər yaradır. Məsələn, sənədlərdə aydın göstərilir ki, qızlar bioloji və psixoloji cəhətdən həddi-büluğa çatmayıblarsa, erkən və orta yeniyetməlik dövründə hamiləlik, həm ana, həm də uşağın sağlamlığına ziyan olan nəticələr doğura bilər. Körpələr vaxtından əvvəl doğula, ya az çəkili, və ya hamiləlik dövrü üçün kiçik ola bilərlər.
Arzuedilməz hamiləlik aşkar olunduqda bir çox uşaqlar və gənc qadınlar bu dilemmanı abort vasitəsilə həll etməyə çalışır və ya məcbur edilirlər. Abortun qeyri-qanuni, baha və ya çətin olduğu ölkələrdə gənc qadınlar qeyri-qanuni abort etdirməyə üz tuturlar ki, bu da faciəli nəticələrə gətirib çıxara bilər .

Psixoloji nəticələr

İntihar
Emosional və fiziki gərginlik döyülən və cinsi zorakılığa məruz qalan gənclərin intihar etməsinə səbəb ola bilər. Bu cür ölümlər, cinsi zorakılıqdan xilas olmaq istəyənlərin seçim azlığının dramatik ifadəsidir.

Əqli (psixi) sağlamlıq problemləri
Cinsi sui-istifadəyə məruz qalan gənclər zorakılıq ucbatından saysız-hesabsız psixoloji əzab-əziyyətlərə düçar olurlar. Bir çoxları həddindən artıq ruh düşkünlüyü, patoloji qorxu içində olur, digərlərində isə travmalı stress əlamətləri təzahür edir. Onlar həmişə yorğun olduqlarına baxmayaraq, yata bilmirlər; onları qara basır, iştahaları kəsilir; öz ağrılarını boğmaq üçün içkiyə və ya narkotik maddələrə qurşanır, qaradinməz olur, və ya tənhalığa qapılırlar.
Uşaqların cinsi sui-istifadəyə məruz qalması və zorlanması uşaqlara da böyüklərə vurulan kimi psixoloji xəsarətlər yetirir. Bir dəfə cinsi təcavüzə məruz qalmış qurban uşaqdırsa və sonra ona lazımi kömək göstərilməyibsə, həmin uşaq uzun zaman bu təcavüzün mənfi təsiri altında qalır. Ailədəki qadın zorakılığı kimi, uşaqlarla pis rəftar da çox vaxt illərlə davam edir və nəticədə uşaq böyüyərkən də bu acılar içində yaşayır. Məsələn, uşaqlıqda pis rəftar edilmiş qadınların mənliyinin alçaldılması, həmin qadınların sağlamlığı və ya əmin-amanlığı təhlükə altında olanda vəziyyətdən çıxmaq üçün az cəhd göstərmələrinə gətirib çıxara bilər.

Zorakılıq şahidi olmalarının uşaqlara təsiri
Ailədə zorakılığın şahidi olan uşaqlar çox vaxt elə eyni əlamətdən özləri cismani və ya cinsi zorakılığa məruz qalan uşaqlar kimi əziyyət çəkirlər. Atalarının və ya ögey atalarının analarına qarşı zorakı davranışının şahidi olan qızlar, zorakılıq olmayan evlərdəki qızlara nisbətən zorakılığı ailədə evliliyin adi bir halı kimi qəbul edirlər. Digər tərəfdən eyni zorakılığın şahidi olan oğlanlar, böyüdükdən sonra öz tərəf-müqabillərinə qarşı zorakı olurlar.